هذي قصه جازت لي بالحيل قريتها بكتاب للراوي المعروف محمد الشرهان اللي اسمه (سالفه وقصيده) اتمني تجوز لكم وتحوز على رضاكم الكلام اللي بيجي بين الاقواس كلام الشرهان للتنويه فقط اترككم مع السالفه ........
هذا واحد من الشعراء اسمه علي بن ابراهيم القري رحمه الله من الشعراء البارزين شاعر نظم وشاعر رد واسلوبه عجيب
مره من المرات صار له موقف واللي ثبت هالموقف ذا القصيده يقول انا طلعت من قريتي عزوبي راح يدور له شغل المهم لقي له عمل في مدينه بعيده ويشتغل فيها مثل ماتقول بياع شرّاي او موظف مدري عاد وش كان وضعه لكن يقول انا معي يوم اجي للديره هذي شنطه وفراش وغريضات والديره احسبها برد مدري عن طبيعتها انها حر جايب معي بالطو شرطه ماله ازارير ذاك الاول وجايب معي ثوب شتاء
المهم يقول يوم طبيت الديره هذي جيت اسئل عن جماعتي يقول الفيت على مجموعه من جماعتنا عزوبيه في بيتهم يقول قعدت عندهم وهم مثل ماتقول ثلاث اخوان سمحين وطيبين
هم من اهل القصيم ذولا فكل من جا من القصيم الفى عليهم الين يتسهل امرهم
يقول قعدت عندهم ثلاث اشهر الين اني حصلت دراهم بعدين استقليت ونزلت لحالي لكن انا عشان اوضح زياده اعطيكم نبذه عن بيت العزوبيه
لاصارو عزوبيه دائما وش اكثر مايصير عندهم المزح واللعب وشاهي ثقيل وسهر فيقول مثلا تجي وتلقى هذا متمدد وحاط رجله على الجدار ويقرا له رساله
وهذا يقرا على هذا خط جاي من اهله من بعيد يقرا عليه لانه مايقرا ولاجا الخبر مثلا حوال العائله قال له اقصر حسك !!! اقصر حسك
يقول انا جيت قعدت عندهم والا هم ذربين حتى في طبخهم يشرون لهم شوي لحم ويقطعونه على كبر محايات المرسمه ويطبخها اخو لهم يعرف يطبخ ...وهنا شاي ثقيل مايصب الا برخصه^^^ ياحليلك يالشرهان راعي نكته اوما مايصب الا برخصه ههههههههههه^^^
المهم يقول انا عقب ثلاث اشهر حصلت رويتبات وجمعتها ولكني ما ارتاح الا لحالي يقول وانا القى لى واحد قلت يافلان قال نعم قلت ماتخبر بيت للاجار قال الا بس انت عزوبي والا عايله قلت الا عزوبي قال هالبيت يبي يأجر يقول راح وجاب مفتاح المهم انه استأجر البيت يقول البيت حليل واول ماتدخله ديوانيه على يدك اليمنى تمشي شوي تلقى محل يصلح مطبخ وله دريجة ترقيك على السطح يقول وانا انظف البيت حليل وزين مافيه عيوب الا انه طامن عن الشارع الا مني بغيت افتحه اثني ظهري شوي كني افتح تجوري
يقول المرزام اللي يزينه مهوب فوق الباب بالظبط منفهق عن الباب شوي(ترى ياجماعة المرزام له سنع في القصيده ماجبته عبث)المهم المرزام مهوب قريب للباب مره منفهق شوي لكن اطول الرجاجيل يتناوشه....
يقول جاء مره من المرات قد مضى لي ثلاث او اربع اشهر والا انا محصل خير حوالي (76) ريال فضه عربي
من اول رابطها في ذاك الصرار لو تومي بها ثلاث اربعه مرات ماتوحي لها حس ^^وصف بليغ^^
يقول حاطها بالشنطه وفيها اغراض ( الحين اعلمكم وشو اللي بالشنطه)
المهم يقول جا مره من المرات فيه ناس من جماعتنا يبي يسافرون قالو يابو ابراهيم حنا نبي نسافر نبيك تقعد في بيتنا لان فيه ذهب وفيه اغراض اهلنا وانت بيتك ماعليه الا العافيه ان شالله وفي وسط الديره نبيك تقعد في بيتنا الين نجي يقول اهمل بيتي واروح اقعد في بيتهم من جماعتي...
يقول قلت الساعه المباركه............
المهم انه قعد في بيتهم وقام مايروح لبيته فيه واحد موبد البيت ان مافيه احد المهم يقول جا واحد وحط يده على المرزام واطمر لانه ماغير دور ارضي
طبعا البيت مافيه احد ودائما اللي بيسرق يمشي شوي شوي فهق الستاره شاف المطبخ مافيه شي طالع والاهو يشوف الشنطه تحت خضراء وفيها وردتين صفر ^^يالبى الوردتين الصفر من جد توصيف دقيق خخخخخخ^^
ويجي السروق يدور مفتاح الشنطه دائما ما يبعد عنها دوره مالقاه ... رجع للوتد اللي بالدرجه واخذه واركزه في قفل الشنطه وعض برطم وصرّ عين عشان مايصير له صوت ^^ عض برطم وصرّ عين وربي تسني اشوفه قدامي يالبا الوصف الدقيق هههههه الا وش مدريه انه عض برطم ^^
فعلا فتح الشنطه يوم فتح غطاها والا في مخبات الشنطه المكاتيب اللي تجي من اهله المهم اول مايوافيه في علو الشنطه بشت جديد كان يصلي فيه الجمعه اخذه الحرامي .. يوم وخر البشت والا فيه دربيل ملفوف في خرقه طالع والا هذي الفلوس وهو ياخذها طالع والا فيه فنايل جديه وطالع والا فيه قارورة طيب وفيه مكينه حلاقه ومقص المهم ماخف وزنه وغلي ثمنه كله جمعه كان من ضمن الاغراض ذي طواقي ذيك اللي مكتوب عليها بأصفر مكه المدينه هالحين يبي يجي لها سنع....
^^ ورد اللون الاصفر اكثر من مره شكله كان سائد فى هاك الوقت او موضتهم خخخخخخ ^^
لف على المطبخ وخذ الرز وخذا كيس صغير كان فيه زبيب المهم خذهن وصك الباب يقول صاكن الباب برجله لانه محمل ^^ يازين اللي يخليك تسنك شايف السالفه ^^
يقول جيت لبيتي والا الباب مهجوج والقفل مجدوع هناك والوتد والاغراض والشنطه والا ه ماخذ كل شي واقعد كل ذيك الليلة وانا اهوجس من تهقاه يسرقني
يقول وانا اتعوذ من ابليس يوم اصبحت يقول ويكتب هذاك المعروض لامير البلد وشرح فيه القضيه المهم مفند كل شي يجي له 8 او 9 صفحات وقد سرق البنود الاتيه دربيل - دراهم - كذا سراويل فنايل - رز - زبيب - طواقي صفطها واخذها وراح يشتكي على امير البلد اللي هو كان فيهاكان الامير شاعر يقول يوم جاء قاله الموظف نعم قال له انا والله شكّاي وكان الامير مهوب موجود يقول قلت له وين الامير ؟ قال له مهوب موجود قال متى يجي قال له بكره تجي تلقاه يقول يوم جيت بروح قال له الموظف وكان يعرفه من قبل قال تعال تعال هالحين كل هالمعروض تبي تقدمه للامير !!!!!!
ذي اوراق واجد وهو مهوب فاضي يقراها ورى ماتحط لك بيتين شعر حتى تلفت انتباهه ؟؟!!
يقول واروح للبيت وارجع واقوم واشقق الاوراق واحط لي كم بيت ابلغ من تسعين صفحه
يوما جا الامير على موعده خلاني الموظف الين خفو الناس من عنده وقال يالله رح هالحين وسلم عليه فهو يقول جيت وقلت:
حي الله اللي خواطرنابـشوفه تــــــــطيب
حيث ان باله بالـعواطف والنفوس اعتبــار
وحتى بلدنا جنـــابه في وجــــودك رحـــيب
وبغيبـــتك تقــــل مضروب عليها حصــــار
ونبــــدأ نحسب لغيبــــتك السبوع تحســـيب
ونصـــبر على فقدكـــم لاشك صـــبر اضطـــرار
والحمـــد للي جعـــلك اليوم عنــدي قـــريب
حتى اني اخبرك باللي عقـــب مارحـــت صـــــار
وش صار :
لي قــــصة ياطويـــل العمــــر شرحه صعـــيب
لاشك ابي اختـــــصرها لك يالامـــير اختصـــار
الله يجـــــيرك وحنــــا من راداة النصــــــيب
لص خسيـــــــس على محاكيك شن المــــــــغار
قمز بيــــــتي وحصل فيــــــه مرعى خصـــيب
وفلى ولك الكــــــرامه تقل تسنــــه حمـــار
ملابــــــس مابعد لبـــــست ورز وزبـــــيب
ودراهـــــم حصـــــــله مصـــــروره في صرار
هذا حصــــــل وانا عند الجمــــاعه مغــــيب
مانيـــــــــب حاضر وليل الامن مثل النهـــار
وقمـــــت اتفقـــــد معارة هالحبيب اللــبيب
اللي اسلوبــــــه بفتح المقفـــــلات ابتكــار
ومن يوم شفت ان جرح البيت جـــرح عطيـــــــب
غديــــــت في هالمصيـــــــبه بين غـــار ونــار
قال له الامير تتهم احد ؟؟ قال :
ما ادري من ارمي بها الدعوه الوخيمه واصيب
ناس طــــــــوال على التهمه وناس قـــصار
قال له الامير وش تبي قال :
ابيــــــك والظن بـــــالله ثم بـــك مايخيب
تعلق بـــــكبد القضـــــيه من عزايمـك نار
قال له ابشر
يقول ثلاث ايام ندور يقول والله نهار ثالث قد ايسنا اننا نلقى شي لكن يوم الله اراد مرينا من عند السوق اللي يبيعون الزبد ذا والا الشويب حمقي لو تقول له كم ذا مرتين قال ماعندنا ناش للبيع يقول يوم جينا نبي نرجع لديت نظري يقول شفت وحده من الطواقي حقاتي اللي مكتوب عليها مكه المدينه يقول قلت لخويي ها عندك عندك !!!!!
هذي من الطواقي قال متأكد قلت كيف؟
قال خلاص رح يقول يوم صار نهار رابع وهم ينادوني في الاماره والا هم جايبين هاك الرجال اللي شكله تسنه جذع مشبوب فيه عليه وحده من فنايلي وواحد من سراويلي والدراهم ماكلها مابقى منها الا سبعه قالو هذا رفيقك المهم جازوووه وفكو حقي وعسى الله يعزهم وينصرهم.......
وارجو انكم استمتعتوا بها القصه انا ماودي اجيب سوالف السرق وما السرق ولكن لما فيها من الطرافه والمتعه.....
موضوع: قصة عزوبي 
الإثنين 21 أبريل 2008, 06:07
